Publica: Thursday 2 September 2010
Atencion pa expresion artistico y cultural di hoben
’Halsa bo bos’ den Luna Cultural
 Bo por spera 5 presentacion yen di ambiente pa hoben na september. Nos ta spera bo den nos teatro den aire liber parti patras di biblioteca. Download 'Programa Luna Cultural 2010.doc' Cada diahuebs e luna aki ta duna atencion na expresion cultural y artistico di hobennan na Aruba.
Publico por wak diferente presentacion di hoben. Banda di esaki hobennan ta haya oportunidad pa combersa cu otro encuanto nan formacion artistico. Diferente orador ta conta di nan experencia di organisa y maneha proyecto pa hoben. Tambe ta bay wak e maneho for di instancia cu ta traha riba tereno cultural. Lo tin oportunidad pa discusion y intercambio cu e oradornan. Riba e fanpage di biblioteca (FaceBook) hobennan por participa na un discusion tocante formacion artistico di hoben na Aruba.
Durante cinco diahuebs anochi ta enfoca riba diferente disciplina: Arte visual, Teatro, Baile, Musica y Literatura. Ta clausura e Luna Cultural cu un Cafe Literario riba e ultimo diahuebs di september. Hobennan di Parlamento Hubenil ta haya oportunidad pa modera y guia discusion. Bo ta bon bini.
 Masha danki na CEDE Aruba pa e cooperacion, sosten y apoyo.
Riba programa pa diahuebs anochi tin: Academia musical Harpa y Cuarta, Jonathan Croes (Canto), Sra. Sharine Croes-Dubero (Un carera den Musica), Fundacion Desaroyo Educativo Comunitario (FDEC), sigui pa un charla cortico di Sr. Carlos Bislip jr. Por ultimo 4 solista Hilyann Croes, Veloushka Krozendijk, Mandy Villasmil y Kiziah Trimon.
Halsa bo bos
Diferente workshop pa hoben na biblioteca na september
Pinta modelo y Fashion design
 Biblioteca Nacional Aruba den cuadro di Luna Cultural ta organisa diferente actividad y workshop. Diaranson dia 1e di september tin un workshop pinta modelo (modeltekenen) di 4’or pa 6’or, sigui pa un workshop Fashion design di 2 dia cu ta tuma lugar diaranson dia 8 y dia 15 di September, tambe di 4’or pa 6’or. E workshop aki ta 3 diaranson sigui y ta caba cu un presentacion cortico dia 16 di september anochi. Workshop Pinta un paisahe pa hoben
 Dialuna dia 6 y 13 di september tin e workshop “Pinta un paisahe” di 16:45 pa 19:45. Pa e workshop pinta un paisahe ta studia e composicion di un paisahe y perspectiva. Elvis Tromp ta mustra na un manera simpel con pa set-up un pintura di paisahe y duna bida y profundidad. Ta duna tips balioso pa laga e lus briya riba bo cuadra. E metodo cu lo wordo usa ta acrylic. Workshop Teatro
 Dianan 20, 21 y 22 di september ta ofrece un workshop Teatro (Dramatische expressie) pa hoben di 2’or pa 4’or. E workshop aki ta 3 dia sigui y ta caba cu un presentacion cortico dia 23 di september anochi. Charla riba un carera den Baile
 Dialuna dia 13 di september tin un presentacion riba un carera den Baile. E charla ta wordo duna dor di Alydia Wever, bailador profesional, choreografo y docente di baile. Alydia Wever ta duna un bista di kico un carera den Baile ta ensera. Alydia ta dirigi su mes riba hoben cu ta aspira un carera den Baile pa asina nan por forma un idea cla di e trayecto di un estudio den Baile y kico por haci cu esaki despues den bida. Tambe hobennan por haya conseho encuanto nan formacion den baile for di Alydia. E presentacion lo ta den Sala Diamante dialuna 13 di september, di 3’or pa 4’or y mey.
Guia di carera den un disciplina di arte
Sra. Sharine Croes-Dubero ta duna hoben cada diahuebs anochi informacion riba un estudio den un di e disciplinanan di arte.
Mas informacion y pa registracion por email: info@bibliotecanacional.aw of yama 582 1580. Cupo ta limita.
Workshop Haiku pa 60-plussers na biblioteca  Diahuebs awor dia 9 di september for di 9’or di mainta te cu 11’or tin un workshop Haiku specialmente pa personanan 60-plus, pero tambe pa otro interesadonan na Biblioteca Nacional Aruba. Haiku ta un forma di e arte di poesia Hapones y ta consisti di 3 frase y na tur 17 silaba (Un frase di 5 silaba, 1 frase di 7 silaba y e ultimo tambe 5 silaba). E Haiku tradicional ta duna un impresion di un experencia di e sintinan. Haiku ta yen di emocion. Un ehempel di un Haiku famoso di e poeta ta di Matsuo Basho:
Ach oude vijver
een kikker springt er in
geluid van water Y uno na Papiamento: Kico mas dushi
Cu mira tapushinan
Baila den biento Caracteristica di un Haiku ta cu e no tin nod’i rima. Hopi biaha e ultimo frase ta un sorpresa. Guiador di e tayer ta Sr. Roy Solognier. E tayer ta tuma lugar den Sala Diamante na Biblioteca Nacional Aruba den George Madurostraat. Participacion ta gratis. E actividad literario aki ta den cuadro di Luna Cultural. Biblioteca Nacional Aruba ta organisa diferente actividad pa 60-plussers. Tur 60-plussers ta bon bini den Sala Diamante di biblioteca na Playa pa bebe un koffie hunto. Ta encurasha participantenan pa expresa nan creatividad siñando algo nobo.
Tocar y luchar
Documentario riba educacion musical Riba programa pa Luna Cultural tin ‘viewing’ di un documentario riba educacion musical, conoci bao di e nomber ‘El sistema’, na Venezuela. Esaki pa medio di e storia tras di e National System of Youth and Children's Orchestras of Venezuela. E importancia di educacion musical ta wordo treci dilanti y e efectonan cu esaki tin riba e formacion total di un mucha y e posibel futuro di un mucha. Titulo di e documentario ta “Tocar y luchar” y ta na Spaño y Ingles (subtitles). ‘El Sistema’.
 E programa ‘El sistema’ ta existi mas cu 30 aña y a produci hopi musico clasico y a transforma bida di hopi mucha y hoben Venezolano menos privilegia. Muchanan cu tabata biba den circumstancia menos favorabel. E ta promove practica di musica colectivo pa medio di orkestanan sinfonica como un manera pa yega na organisacion social y desaroyo comunitario. Ta invita publico interesa den formacion artistico y musical di mucha y hoben pa bin wak e documentario aki na biblioteca, Sala Diamante, diaranson awor dia 8 di September pa 6’or y mei. Entrada ta gratis. Sra. Mayra Kock-Garrido, dirigente di Coro Ars Nova ta duna un introduccion y ta contesta cualkier pregunta. E documentario tin duracion di 60 minuut. Un y tur ta bon bini. |
Arubahost