Aki ta sigui e historia di Biblioteca Nacional Aruba.

Tocante BNA
E palabra biblioteca ta nifica luga di warda buki pero na Aruba e biblioteca ta funciona tambe como centro cultural, esaki mas ainda despues di e Status Aparte.

Desde 1986 biblioteca por yama su mes Biblioteca Nacional Aruba. BNA ta duna informacion di tur manuscrito y publicacion cu e comunidad ta produci, por ehempel buki, corant, revista, raport y relato y ademas ta colecta, ordena y ofrece publicacion den diferente forma na publico, por ehempel buki, corant, revista, raport, relato y material audiovisual.Tur esaki sin importa religion, color politico y status social di usuarionan. Asina tur hende ta bon bini na BNA.
Pa un comunidad bon informa, un biblioteca bon desaroya cu un colecion amplio, actualisa y accesibel ta un condicion indispensabel.
Semper BNA ta percura pa mantene cu su coleccion ta up-to-date. Biblioteca ta dispone na e momento aki di un coleccion di mas o menos 100.000 buki.

Prestamo, entrega y orario
Servicionan di Biblioteca Nacional Aruba

Pa facilita cada miembro di biblioteca mas tanto posibel biblioteca ta ofrece e servicio cu por busca buki tanto na Biblioteca na Playa como na sucursal San Nicolas. Ta keda na e miembro pa scohe e biblioteca mas cerca riba su ruta. Kizas e miembro ta biba na San Nicolas pero ta traha of ta bai scol na Playa of net lo contrario. 
Biblioteca Nacional Aruba ta facilita su miembronan tambe pa haci entrega di buki na e sitio di nan escohencia, sea na Playa of e sucursal na San Nicolas. E cantidad maximo di buki ta keda igual y no ta asina cu por bai cu mas buki cu loke e miembrecia ta indica.

Pa purba na yega di duna mas tanto hende posibilidad pa bishita biblioteca,  ta habri 5 anochi di dialuna pa diabierna. Biblioteca na Playa ta habri 3 anochi den siman te 8’or di anochi, dialuna, diarason y diabierna. Biblioteca na San Nicolas ta habri 2 anochi den siman te 8’or, diamars y diahuebs.
BNA ta ofrece mas cu solamente material publica. Aki ta sigui un bista di loke BNA ta ofrece.

Sala di estudio
Tur material, tambe loke bo no por fia, bo por studia den e sala di estudio na BNA. Den e espacio aki bo ta haya diferente enciclopedia, diccionario y documentario cu por sirbi bo ora di studia. Tambe bo ta haya informacion di literatura den forma di reseña y informacion biografico di escritornan Hulandes, Ingles y Spaño.

Copiamento
Si bo kier copia material special esei por. Tin dos posibilidad. Bo por cumpra un carchi special pa copia na bali pa Afl. 7.50. Cu e carchi aki bo por copia pa cinco florin. Cada copia preto cu blanco ta costa Afl. 0.20. Despues cu bo caba di gasta 5 florin bo por entrega e carchi na bali y bo ta haya Afl. 2.50 bek.

Sala di computer
Desde augustus 2003 BNA tin un Internet room cu 15 computer cu conexion di internet. Tur hende por haci uso di e computernan aki. Riba e computernan aki bo por skirbi texto y mira cd-rom y mucho cos. Uso di e computernan cu e obhetivo di skirbi texto ta por nada cu excepcion di uso di internet. Pa esaki nos ta cobra Afl. 2,00 pa 30 minut.

Huurmento di sala/espacio
Den e edificio di BNA por reserva un espacio special pa exposicion artistico y comercial. Pa mas informacion bo por yama e secretaria durante ora di trabou na telefon : 582-1580 ext. 224.