Aki bo ta haya mas informacion tocante diferente departamento di BNA.

Departamento di adulto
BNA ta dispone di un departamento pa adulto caminda teenagers y adulto por acudi pa buki informativo, lectura y literatura na Papiamento, Hulandes, Ingles y Spaño. Tambe nos departamento tin un coleccion chikito di buki na Aleman y Frances.
Cu ayudo di nos terminalnan publico bo por mira si e buki cu bo ta busca ta paden.
Den nos sala di estudio tur hende di 12 aña pariba por acudi. Den sala di estudio bo ta haya un variacion di material, documento, informacion di literatura y cd-romnan informativo.

Pa cualkier informacion tocante nos coleccion por acudi na mesa di informacion.

Departamento di mucha y adolesente
E hubentud tambe por acudi na BNA. Na e departamento di mucha y adolesente bo por haya buki y otro material cu storia y informacion special pa mucha y hoben. E departamento pa mucha tin buki di prenchi, buki di storia, buki informativo y tambe un coleccion di “buki hubenil corona�. E bukinan ta disponibel na Papiamento, Hulandes, Ingles y Spaño. Cu ayudo di nos terminalnan pa publico bo por busca buki di mucha tambe. Pa mas informacion por acudi na mesa di informacion. Pa lesa buki y studia tin un huki special pa studia.

Sala di estudio
E sala di estudio di BNA ta patras den e edificio na e piso abou. Den nos sala di estudio tur hende por acudi di 12 aña pariba. Pa haci uso di e espacio aki no ta necesario di ta miembro di biblioteca.
Den e sala di estudio bo por studia, lesa revista, consulta y investiga den nos coleccion informativo. BNA tin diferente enciclopedia, diccionario, file documentario y informacion literario den forma de resumen, reseña y informacion biografico di autornan.
Tambe tin un computer disponibel, riba cua bo por procesa texto y unda bo por busca informacion riba cd-rom. E servicio ta completamente gratuito, cu excepcion di printmento di texto y sacamento di copia. Saca copia preto cu blanco ta costa Afl. 0.20 of Afl. 0.25. Den e sala di estudio bo por acudi pa tur sorto di informacion na e mesa di informacion.

Coleccion di Revista
Biblioteca ta ofrece un coleccion interesante di revista, tanto pa adulto como pa mucha. Mayoria parti di e coleccion di revista ta den sala di estudio caminda por sinta lesa trankilo. Revista pa mucha ta keda warda den departamento hubenil, y ta warda e revistanan local y di Antiyas y Caribe den Sala Arubiana. Pa haya un idea di e coleccion di revista den Sala Arubiana por nabega pa e pagina “Coleccion Nacional” despues pa ‘Revista’. Por saca copia di articulo libremente.

Internetroom (Centro di Informacion Digital)
Den e sala aki bo ta haya corant local, Americano y Hulandes

Mediadienst / Servicio Audiovisual
E servicio di media di BNA ta ocupa su mes cu e produccion audiovisual di material di y tocante di Aruba, tur hende cu ta miembro di BNA por fia material na e servicio di media. Esaki ta ensera cinta di video, seri di dia, cinta di zonido y casette. Docentenan por presta e material aki pa finnan educativo. Tambe e docentenan por presta aperatura manera ‘overheadprojector’, diaprojector y screen por nada, si esaki ta pa uso educativo.

BNA ta bin cerca bo
Special pa e muchanan di scol cu no por bini of tin dificultad pa yega BNA tin bibliobus. E bibliobus ta core pasa diferente scol. E tin un coleccion di buki pa hubentud te cu 13 aña. Den e bibliobus tambe hubentud por acudi pa tur informacion y por conta tambe riba un ayudo personal. Si acaso un buki no ta disponibel anto e Bibliobus por trece cu e siguiente buelta. E servicio aki no ta costa nada. Durante e bishitanan na scol ta duna atencion na promocion di lesamento.

Servicio di Prestamo na Hospital Horacio Oduber
Pa añanan caba BNA ta presta pacient na hospital buki y revista pa haci nan estadia den hospital mas ameno. E servicio aki ta den man di mas o menos 10 boluntario. Cada diamars mainta e boluntarionan ta pasa cu nan garoshi yen riba cada piso di hospital. E bukinan cu nan ta usa pa e servicio aki ta hopi biaha donacion of parti di coleccion di biblioteca.