Naturalmente BNA ta habri pa teenagernan tambe na Playa y San Nicolas. Bo ta puntra bo mes kico BNA tin pa mi? Mayoria di boso ta na scol ainda of ta studiando na un academia of universidad. BNA por yuda bo y ta un sosten pa bo durante bo estudio. Por ehempel BNA tin un sala di estudio, unda bo por sinta repasa of studia bo materialnan. Tambe bo ta haya den e sala di estudio articulo, documento y informacion tocante diferente tema cu por yuda bo den bo trabou y cu scol.

Nos coleccion
BNA tin hopi buki util di reseña di literatura Hulandes, Ingles y Spaño. Si nos no tin e reseña cu bo ta busca bo por busca riba internet: http://www.internetcollege.nl of http://www.schrijversnet.nl . Si bo tin cu lesa buki pa examen nos ta recomendabo wak e lista di buki cu por lesa na www.scholieren.com/boekverslagen/literatuurlijst.

Riba un di nos computer cu aceso na internet bo por surf y chat pa solamente Afl. 3,00 pa 30 minut.

Kisas ta asina cu bo mester investiga e comunidad Arubiano, Antiano of Caribeño anto bo por acudi na nos departamento di Arubiana/Caribiana. Ajki tin un coleccion amplio di buki, documento, revista, articulo di Aruba, tocante Aruba, Antia, Hulandes y Caribe. Tambe tin suficiente atlas y enciclopedia disponibel. Algun di nan ta obranan scientifico, pero si bo tin pregunta bo por acudi semper cerca un di nos coleganan. No ta fia  e materialnan aki, pero si bo por saca copia. Un copia ta costa Afl. 0,25.

Bin descubri cuanto informacion BNA tin pa bo!

Computerlab
Pa traha relato of skirbi reseña bo por bin traha den nos computerlab na Oranjestad y San Nicolas. BNA tin 20 computer cu aceso riba internet, na bo disposicion. Bo por wak CD-rom. Ta bon pa bo mes trece un iskette.
 

Bira miembro
Pa haci uso di nos facilidadnan bo no mester ta miembro di BNA. Si bo kier fia buki lo bo mester bira miembro prome. Via nos pagina Miembrecia bo por lesa con pa bira miembro. Bo por pasa na e balie di BNA pa mas informacion tocante di miembrecia.

Pasa libremente na BNA pa lesa y studia. Y bin haci uso di informacionnan cu BNA tin pa ofrece bo!

Studia pa Information Manager? Sigur!! un carera interesante!!
Biblioteca Nacional Aruba mester di profesional hoben

Na diferente pais na mundo bo por continua bo estudio den ramo di informacion. Sea na Merca, Canada, Puerto Rico pero tambe por ehempel na Hulanda. E Hogeschool na Amsterdam, Hulanda ta ofrece un educacion den e ramo aki riba nivel di HBO, esta Hogere Beroepsopleiding.

Information manager
Con bo ta maneho informacion? Con bo ta percura pa un persona haya e informacion corecto y necesario den e mihor forma? Con bo ta investiga mercadonan di media y con bo ta identifica e necesidad di informacion di bo publico?

Kico ta e tareanan?
Abo e manager di Informacion ta busca datonan, sea texto, imagen of sonido. Abo como specialista ta haya bo caminda na un manera efectivo den e diferente fuentenan di informacion. Bo ta construi sistemanan di acesa informacion (software y database) y bo ta acumula informacion. Bo ta organisa e informacion na un manera logico. Bo ta percura tambe pa e contenido por wordo usa mas biaha. Bo ta conserva e herencia cultural y bo ta hasie publico y acesibel.
Bo ta percura pa informacion ta keda bon warda y acesibel pa futuro generacionnan.
Bo ta ofrece un producto bon pa cada peticion di informacion di cada usuario.

Biblioteca Nacional Aruba mester di mas profesional den ramo di informacion pero naturalmente bo por traha den otro tipo di organisacion tambe cu un diploma reconoci. Si bo ta desea mas informacion riba e estudio aki bo por bishita e website di Hogeschool Amsterdam www.hva.nl Si bo ta desea di haya un impresion di e profesion interesante aki por yama Biblioteca pa hasi un cita cu un bibliotecaria pa un splicacion. Bo por haya un recorido tambe den biblioteca. Por bishita un otro website cu yama www.werkenindebibliotheek.nl