Fundacion Bon Nochi Drumi Dushi a logra un biaha mas!
Fundacion Bon Nochi Drumi Dushi a organisa su di dos bustour anual.
E biaha aki e tema tawata “comparti” cu enfoke riba placer di lesamento combina  cu actividad na dos instancia. Alrededor di 60 mucha cu mas di 10 boluntario a haci bishita na Casa Cuna y Imelda Hof. E muchanan a keda encanta cu e storianan di Compa Nanzi. Na casa Cuna, Kevin Swaen di apenas 9 aña a capta atencion di e muchanan cu e storia, ‘ E documento’, skirbi pa Desiree Correa. Na Imelda Hof e muchanan a scucha cu hopi atencion e hobennan Lynette y Laura conta y por a intercambia activamente ora di haci pregunta riba e storianan.
Prome cu a clausura e dia masha ameno, e muchanan a gosa den Parke Jaburibari buscando pista di storianan di Compa Nanzi den forma di Scavenger Hunt. Na Jaburibari e hoben, Renald THiel, fuera di a conta storia a comparti cu e muchanan su pasion pa e deporte di bowling.
E reaccion di tanto e mayornan y muchanan tabata sublime. Fundacion Bon Nochi Drumi Dushi a conta cu un team cu a traha duro pa logra e metanan rond di lesamento. Pa e bon acogida cu tabatin pa cu e inscripcion, sigur lo tin e mesun entusiasmo pa sigui organisa mas bustour den futuro. Tanto ariba Facebook como Gmail e contacto y comunicacion ta creciendo. E biaha aki den un tempo record di un siman  inscripcion cera.

Bon nochi drumi dushi
Tremendo bustour cu contamento di storia den naturalesa

E weekend di 27 y 28 di maart  voluntarionan y directiva di Fundacion Bon Nochi Drumi Dushi tawata hopi ocupa cu actividad di promocion di lesamento.  E bus, cortesia di parti di De Palm Tours, a yega exactamente na e momento palabra, esta 2.30 di merdia.
Yen di entusiasmo y expectativa e muchanan a subi bus rumbo pa Casibari, e prome parada. Aki e muchanan a scucha storia y a haña e tarea di busca mata of piedra straño hinca den e saco di papel cu nan a haña di nan guia. E guianan tawata encurasha e muchanan pa cuida nan saconan di papel bon, pasobra na final tawata tin un plan pa e contenido di e saconan. E muchanan a scucha cu atencion, nan a combersa cu smak y a contesta pregunta. Prome cu subi bus bek nan a refresca cu awa y fruta. E recorido a sigui pa Ayo, unda a conta e di dos storia pa despues aki tambe e muchanan explora e luga  wak kico nan ta haña pa hinca den nan saco. E muchanan no a haci wega cu e tarea specifico aki, nan tawata busca cu concentracion y studia cada obheto prome cu dicidi di hinca esaki den saco.
Ta sigur cu den e grupo tawata tin varios mucha cu talento y interes pa e trabou di arqueologia den futuro. Despues di a refresca un biaha mas cu awa y fruta e grupo a join sra. Olinda Rasmijn di Stimaruba, cu tawata warda na Ayo. Sra. Rasmijn a guia e grupo door di e rooi sorpresa, e rooi di Santa Marta. E rooi ta core den tereno priva, sra. Rasmijn a pidi e doño permiso pa e muchanan por a conoce e rooi.
Nan a sinta den circulo y por a intercambia cu otro tur loke nan a haña durante nan exploracionnan.
E muchanan a siña di diferente tipo di baranca y piedra, dicon nan tin cierto forma y con cada baranca yama. Sra Rasmijn a conta e muchanan cu e sitio den e rooi unda nan tawata na e momento ey ta di hopi importancia pa naturalesa di Aruba, pasobra 3 rooi ta topa otro y ora awa yobe e parti ey ta bira hopi hundo. Aki a conta e muchanan e di tres storia, cada bes e contado tawata conecta e storia cu e parti di naturalesa unda e grupo tawata. Na regreso e muchanan a disfruta di juice di tamarijn crioyo y algo di come.

Pa e actividad aki  a scohe e buki Nos Fabula di sr. Roland Peterson, mirando cu e buki ta trata nos
naturalesa y nos a keiro den naturalesa. E storianan a cuadra cu e ambiente cu e grupo tawata aden.
Fuera di comparti e placer di lesamento na un forma diferente cu e mucha, FBNDD kier a concientis’e di e bunitesa di nos naturalesa y e importancia di cuida esaki.
E bustour a sirbi un meta social tambe. Durante e tour nan a comparti cu otro y sera amistad.
E caranan contento y tur e storianan cu e muchanan a baha di bus ta conta ta prueba cu nan a gosa di un atardi yena cu actividad y aventura.

Youth-Expo
Den e mesun weekend aki, dianan 27 y 28 di maart, Fundacion Bon Nochi Drumi Dushi a participa na Youth-Expo 2010 hunto cu Biblioteca Nacional Aruba. FBNDD tawata tin su mesun stand pa duna informacion tocante e proyecto y e importancia di lesamento. A probecha tambe di e oportunidad pa bende articulo di e proyecto y buki.
Hopi mayor a bishita e stand pa informacion y inscribi nan yiu pa e periodo di october. Ta remarcabel con impresiona mayornan ta keda, ora splica nan cu 10 of 15 min di comparti e placer di lesamento cu e mucha prome cu e drumi, ta trece mayor y yiu mas serca di otro.
Lesadonan di e proyecto a conta storia tambe den bibliobus y haci actividad cu e muchanan hunto cu trahadornan di Biblioteca Nacional Aruba.
Dos actividad di e indole di e Bustour y Youth-Expo den un weekend, tawata un reto grandi pa Fundacion Bon Nochi Drumi Dushi. 

Inscripcion relampago pa bustour
 
Den un habri y sera di wowo e lista di inscripcion pa e bustour di Fundacion Bon Nochi Drumi Dushi planea pa dia 27 di maart 2010 a yena. Apesar cu e fundacion a premira cu e interes pa e bustour y contamento di storia den naturalesa di Aruba lo tawata grandi, e cantidad di mayor cu a acudi y ta acudi ainda na bali di Biblioteca Nacional Aruba pa inscribi nan yiu(nan) a surpasa tur espectativa.
E fundacion lo kier a duna tur mucha e oportunidad pa participa, pero ta cierto cantidad di mucha so e actividad por aloca. Si bo no a logra e biaha aki, keda pendiente, den luna di augustus lo tin un bustour mas y e fundacion lo haci tur loke ta posibel pa un grupo mas grandi di mucha por participa. FBNDD ta hopi contento cu De Palm Tours tambe ta aporta na promocion di lesamento door di facilita e fundacion un bus pa e tour.

Bibliobus den bario di Santa Cruz

Diasabra anochi, e plenchi dilanti di Centro Deportivo Betico Croes na Santa Cruz, tawata rand rand di mucha y mayor cu a participa na e prome actividad di contamento di storia den bario cu e Bibliobus di Biblioteca Nacional Aruba.
E organisadornan, Fundacion Bon Nochi Drumi Dushi y Seccion Mediateca Escolar di Biblioteca Nacional, por ta satisfecho cu nan a logra nan meta di trece famia hunto pa den nan propio bario scucha storia, musica, presencia comedia, anto tur esaki bou di un shelo cu luna yen.
E anochi a conta cu un programa varia, Tipico Macuarima a habri e programa y a hinca mesora sabor den e anochi cu nan musica crioyo y cantamento di e hoben Rincones di apenas 9 aña, cu un voz y actuacion di un artista formal.
E organisadornan aprecia masha, cu e grupo a haci un espfuerso hopi grandi pa por a presenta e anochi aki, apesar cu nan ta hopi ocupa cu preparacion pa 18 di maart.
Cu uzo di un power point sra. Buckley a duna un splicacion di e proyecto di promocion di lesamento Bon Nochi Drumi Dushi y e calender di actividad pa aña 2010.
Despues di e presentacion varios mayor a acerca miembronan di e fundacion pa ofrece nan ayudo y sosten na e proyeto.
Astrid Gietel a pone e tentnan tembla cu su storia/poesia di e dos lagadishinan Codo y Dodo cu ta box cu otro kibra rabo haci yen di desordo, cu e mensahe, cu ta dushi pa haci bon bek.
E dos hobennan cu a dramatisa e storia a mustra hopi talento y a laga e dos maestronan di ceremonia cu tambe a hunga e rolnan patras aya den rij di actuacion.
Sr. Jeroen Lo-A-Njoe, a pone grandi e chikito sinta scucha boca habri e storia di Gloria cu ta siña di experiencia pa papia berdad y scucha ora cu mayor ta papia y cu tiger no ta cos di haci wega cu ne.
Ompi Jeroen ta domina e don di inventa y conta storia, manera e mes ta bisa, cu ta for di su duim e ta saca e storianan.
Tur hende presente a bay di acuerdo pa duim pa nunca algo malo pasa cu e duim di Ompi Jeroen, pa e por sigui inventa hopi storia mas.
E anochi aki, Fundacion Bon Nochi Drumi Dushi a presenta un primicia pa loke ta material di promocion; un placemat pa mucha, cu e logo di e proyecto y 4 rima di e hoben Kevin Sapuana. E rimanan ta pa stimula mayor pa comparti lesamento cu e mucha ora di come. Fundacion Bon Nochi Drumi Dushi ta hopi contento cu mayornan di Kevin y Kevin mes a duna permiso pa uza rimanan.
 E placematnan ta obtenibel cerca e miembronan di e fundacion.
Nathaly Croes, di Seccion Mediateca Escolar, a bisti 3 pechi e anochi aki, e tawata un di e tremendo MC-nan hunto cu sra. Zetsia Ponson empleado di Biblioteca Nacional Aruba, el a duna alabes splicacion di e funcionamento di Bibliobus ora di bishita scol y na final di e anochi el a conta e storia di e Princesa Arabela, cu su mayornan por a dun’e e regalonan di mas caro y valioso pa su aña, pero cu a keda contento cu e cos di mas simpel, dunando un mensahe hopi cla, cu placa y cos caro no ta duna alegria y felicidad, pero cu esakinan ta scondi den e cosnan chikito y simpel.
E anochi aki tawata tin storia pa tur edad, sra. Maria Geerman di 84 aña a conta storia di antes, con el a yuda busca oro den rooi. Sra. Maria tin un memoria hopi skerpi, e conoce tur e canticanan di tempo cu e soeurnan y pastoornan tawata duna les. El a deleita hoben y grandi cu e cantica Con e trupial tawata canta.
Tin hopi hende cu e organisadornan lo kier gradici pa e exito di e anochi aki, ta dificil pa menciona tur, pero ta na su lugar si pa menciona e team di Biblioteca Nacional Aruba, cu a traha practicamente henter nan diasabra liber, dunando alma y cuerpo pa tur cos por a cana bon. Nan ta campeon.
Tambe e team di boluntario di Bon Nochi Drumi Dushi cu ta conoci caba pa e sosten cu nan ta duna na e proyecto pa varios aña.
Ta bay un palabra di gradicimento na Minister di Infrastructura Ing Sevinger pa su cooperacion.
Tambe na sr. Tromp di DOW, Sr. Nelson Sprock di Conar, sr. Franca di ASU, Sra. Mariola y Sra. Lu, Victoria Bottling Company y Paradera Party Center, pa nan sosten.
Keda pendiente pa e bishita di Bibliobus na San Nicolas den luna di april.

Programa di promocion di lesamento pa 2010

Tempo ta bula, ya Bon Nochi Drumi Dushi tin 3 aña di trabou di promocion di lesamento tras di lomba.
For di un principio e proyecto a conta cu sosten di Biblioteca Nacional Aruba, segun tempo a transcuri e cooperacion a crece y fortifica. Por bisa cu den e 3 añanan e proyecto a conoce un desaroyo positivo pa loke ta su metanan, desaroyo positivo nifica crecemento.

Bon Nochi drumi Dushi a crece den tur sentido di palabra, tanto pa loke ta e cantidad di cas cu a logra bishita como e variacion den actividad. Bon Nochi Drumi Dushi ta bon conoci den comunidad.
Banda di e bishitanan na cas, e programanan di T.V y DVD, e fundacion ta haya mas y mas peticion pa conta storia na fiesta di mucha y creche. Contamento di storia ta hayando su luga bek riba e lista di entretenamento pa mucha. No por para keto awor, mester sigui stimula e crecemento aki. Fundacion Bon Nochi Drumi Dushi a planea un programa completo y extenso pa 2010 cu mas variacion den acercamento di promocion di lesamento.

Despues di un aña di combersacion entre Seccion Mediateca Escolar di BNA y Fundacion Bon Nochi Drumi Dushi, a logra pone Bibliobus riba caminda pa bishita barionan na Aruba, pafo di orario di trabou.
Riba e programa pa 2010 tin 4 bishita planea, cuminsando diasabra awor dia 27 di februari. E Bibliobus lo ta staciona dilanti di Centro Deportivo Betico Croes na Santa Cruz. E actividad ta tuma luga di 6’or di atardi pa 9’or di anochi, cu un programa hopi varia, cu contamento di storia, musica, drama y hopi mas.
Un bunita oportunidad pa famia sali hunto pa comparti e placer den contamento di storia y fortifica e union familiar. Despues di Santa Cruz ta sigui San Nicolas, Noord y Oranjestad.

Esey no ta tur, Fundacion Bon nochi Drumi Dushi tin tambe planea un bustour pa maart cu cooperacion di Stimaruba. Durante e tour den naturalesa di Aruba lo conta e muchanan diferente storia cu mensahe relaciona cu nos naturalesa. Den luna di september lo tene un di dos bustour cu un contenido poco diferente, por divulga si caba, cu e tour aki lo termina cu un quiz.
E dos periodonan di bishita na cas ta keda manera custumber, den luna di mei/juni y october.
Pa e prome periodo e fundacion no por tuma inscripcion nobo, pasobra e lista di espera ta bastante yen y kier cumpli cu tur mucha. Na oktober lo habri inscripcion atrobe.

E di tres serie di programa di TV tambe ta cla pa bay den aire, esaki lo tuma luga den luna di maart, mescos cu lanzamento di e di dos DVD. E di tres DVD lo ta cla pa subi mercado den luna di juli.
Cada luna e fundacion lo publica e calender pa e luna ey den medionan di comunicacion.
Na november ta clausura e proyecto pa aña 2010 cu un actividad sopresa.

Periodo October 2009

Mas o menos 30 lesado ta bishitando casnan rond di Aruba pa lesa y conta storia pa nos muchanan.
Bon nochi, drumi dushi a ricibi 150 inscripcion pa e periodo di october. Poco poco e proyecto ta desaroyando un caracter social y di integracion, mirando cu e biaha aki tin hopi adres na unda cu mas famia a inscribi. Kier men famianan ta scohe pa bishita otro pa comparti e placer di lesamento y haya informacion di e lesadonan tocante e importancia y beneficionan di lesamento. DIrectiva di Bon nochi drumi dushi ta convenci cu e aña aki atrobe nos a logra agrega algun granito na e cero cu nos kier forma pa yega na un clima positivo di lesamento pa Aruba. E proceso en todo caso ta den marcha y lo sigui.

Manera custumber e mucha ta haya como cortesia di e proyecto un tas di canvas cu un buki y un marcado di buki.  E biaha aki e mayor ta haya patras di e marcado di buki diferente tip, e.o con pa lesa pa nan yiu y cua buki scohe.
Manera ta conoci october ta e di dos y ultimo periodo di lesamento pa aña.
Na final di e periodo aki Bon nochi, drumi dushi ta clausura e aña cu un actividad grandi pa tur mucha cu a haya bishita y tur mucha di Aruba cu kier bin disfruta di contamento di storia .
E Anochi di clausura pa 2009 ta den pleno preparacion dor di e comision encarga cu esaki.
Por marca e fecha di 30 di October riba calendar numa y keda pendiente pa mas detaye y invitacion den prensa.
Dia 26 di October pa 6.30, tur lesado ta topa na BNA pa comparti nan experencianan cu otro.
2009 ta un aña di crecemento y desaroyo di e proyecto, diferente actividad cardinal a tuma luga.
Manera ta conoci dia 3 di juli nos a formalisa e proyecto den un fundacion.

Contrario na e custumbrado evaluacion cu cada lesado ta haci despues di tur su bishitanan, Bon nochi drumi dushi, cu financiamento di Cede- Aruba por a encarga un compania pa prepara un encuesta pa investiga funcionamento y desaroyo di e proyecto despues di 3 aña.
E lesadonan a haya un tayer pa prepara nan mes debidamente pa e encuesta aki.
Directiva di Bon nochi drumi dushi a keda masha contento cu e invitacion pa conta storia pa e miembronan di club OANSA, un club cu ta dedica tempo y atencion na formacion di mucha y hoben.
E aña aki tambe, cu financiamento di UNOCA a finalisa grabacion di e 3 programanan di television, 2 serie a pasa ful caba y e di 3 serie ta den proceso di finalisacion pa bay television.
E prome DVD ta practicamente sold out, di dos ta den proceso y aprobacion pa di 3 DVD ta aden tambe.

Conferencia di prensa  di Bon nochi, drumi dushi

Bon nochi, drumi dushi ta un proyecto di lesamento na cas cu tin e meta di brinda famianan un herment di sosten pa rebiba of fortifica e interes den lesamento. Un mucha cu lanta den ambiente cu ta stimul’e pa lesa, tin hopi mas oportunidad di desaroya interes den lesamento.
Na aña 2007 a lansa e proyecto pa prome biaha  hunto cu Biblioteca Nacional Aruba y a sinti cu interes di pueblo tabata grandi pa e proyecto keda desaroya. For di e principio aki tambe Cede Aruba a tuma e decision di financia e proyecto.
E proyecto su enfoke central ta generalmente e mucha di 4 pa 8 aña, pasobra esaki ta e edad mas apropia pa lanta interes den lesamento cerca un mucha. 
Sin contribucion, empeño y motivacion di e lesado boluntario, Bon nochi, drumi dushi no por cumpli cu e meta stipula. A cuminsa na aña 2007 cu mas of menos 20 lesado y actualmente e proyecto ta conta cu mas di 40 lesado.
E lesado di Bon nochi, drumi dushi ta haya un preparacion pa medio di un tayer di lesamento prepara pa Biblioteca Nacional Aruba hunto cu e grupo di trabou di Bon nochi, drumi dushi, prome cu e periodo di lesamento cuminsa. E aña aki esaki ta tuma lugar, diasabra 9 di mei di 9or pa 2or, na Biblioteca Nacional Aruba na Playa.  
Bon nochi, drumi dushi tin dos periodo di lesamento. E prome periodo ta cuminsa e aña aki dia 11 di mei pa 5 di juni y e di dos periodo ta durante luna di oktober. Durante cuater siman un lesado boluntario ta bishita 8 cas di famia, dos biaha. Cada bishita na cas ta dura 30 minuut.

Na november despues di e dos periodonan di lesamento ta sigui un anochi di clausura unda ta invita tur mucha cu a haya bishita na cas durante e dos periodonan. Aña pasa e anochi aki a tuma luga na club don Bosco y a hiba e lema di ‘anochi di fantasia’.
Na aña 2008 e proyecto a expande y cu financiamento di UNOCA a implementa e di dos fase di Bon nochi, drumi dushi. A graba 1 serie di 12 programa pa television y esaki a sigui na 2009 tambe cu un serie di 12 programa mas cu ta pasa na canal 15 tur diamars y diahuebs pa 6 or y mei y tur diabierna na canal 13 pa 7 or y mei.
E aña aki cu financiamento di UNOCA e proyecto lo lansa su prome DVD riba mercado cu ta encera 12 storia graba pa mucha.
Dia 18 di mei venidero Bon nochi, drumi dushi ta tene un exposicion di e trabou di e muchanan cu a bishita e anochi di clausara na luna di november na Club Don Bosco . E mesun dia ey tambe ta lanza alavez e prome DVD di Bon nochi, drumi dushi. Lo tin presentacion di un buki nobo como sorpresa.
Bon nochi, drumi dushi kier invita tur mucha pa bishita Biblioteca Nacional na Playa, diaranzon 18 di mei,  pa 6 or pa presencia  apertura, exposicion di pintura y lansametnto  di e DVD.
Mayornan cu ta interesa pa haya bishita di un lesado na cas por aplica pa participa na e proyecto door di yena un formulario di inscripcion cu tin disponibel  na Biblioteca Nacional Oranjestad of San Nicolas, Van Dorp y Plaza Bookstore y entrega esaki na e mesun establecimentonan aki. 
Bon nochi, drumi dushi kier gradici CEDE Aruba, UNOCA, Biblioteca Nacional y tur su lesadonan pa nan sosten y confianza den e proyecto.

Anochi di clausura di Bon nochi, drumi dushi, un exito rotundo

Diabierna 14 di november, Bon nochi, drumi dushi, e proyecto di lesamento na cas a clausura su periodo di lesamento pa aña 2008.
Prome cu tur cos, ta bon pa laga mayornan sa, cu esaki no kiermen cu e proyecto a stop. Tin mayor cu tabata presente y a puntra cu preocupacion, dicon ta para e proyecto.
E organisadonan ta garantisa cu otro aña juni nan ta sigui cu e mesun entusiasmo y energia y cu lo uza e tempo aki pa evalua, prepara y busca tur medio pa mehora e proyecto.
Coordinacion di e programa tabata den man di Juliet Swaen, studiante di IPA, cu a uza e experencia aki, como parti di su curilo.
E anochi aki a introduci e jingle di Bon nochi drumi dushi; Swushi mushi , un regalo di Tio Ali pa tur mucha di Aruba.
E ambiente di cooperacion tabata sublime, Juliet a traha duro pa organisa e anochi y reparti tarea pa tur e boluntarionan cu a yuda incansablemente.
E MC pa e anochi; Julisa Boekhoudt a sa di guia e programa y tene e muchanan den e ambiente di fantasia di e anochi.
E cantidad enorme di mucha y mayor presente na Club Don Bosco na Noord, tanto mama, tata, welo y wela ta muestra cu e comunidad di Aruba a acepta Bon nochi, drumi dushi como un herment pa uni famia.
Casi tur hende presente a bin bisti cu nan pijama, na entrada nan a haya nan T-shirt di Bon nochi, drumi dushi, pa asina cu e actividad caba nan por a bay cas, subi cama y drumi dushi.
Nan a haya tambe un sticker di colo cu un number pa traha den grupo riba elaboracion di e storia principal pa e anochi aki: Con un mucha homber ta nek e reus.
Tabata un bista masha bunita y dushi, mira mucha cu peluche, cusinchi deken, drumi of sinta abou ta scucha storia.
Tin hasta mayor cu a sinta brasa cu otro ta scucha, manera ta na cas nan ta.

E 3 contadonan, Martica Lugay, Diana Marchena Y Madelene Maduro a conta hunto un storia, compartiendo asina diferente forma di trece un storia cu e muchanan.
Ta increibel con nan a logra capta y manten’e atencion di e grupo di 250 mucha presente.
Despues di contamento di storia a parti e muchanan den grupo di mas o menos 10 mucha, cu bou di guia di un voluntario a traha na elaboracion di e storia.
E contadonan a scohe pa conta e storia di E mucha cu a nek e reus sin sosten di ningun ilustracion, pa duna e mucha su fantasia man liber pa pinta of skirbi algo di e storia.
E resultado di e obranan den grupo tabata tremendo, fuera di e hecho cu e muchanan a haya oportunidad di socialisa dor di traha hunto. E grupo di trabou di Bon nochi, drumi dushi ta studiando e formula mas adecuado pa expone e resultado di e obranan aki.
Cu clausura di e proyecto pa 2008, Bon nochi, drumi dushi sin duda a demostra cu tin un desaroyo positivo pa loke ta e meta di e proyecto.
E clima pa por yega na un cultura di lesamento ta habri cada dia mas y mas.
Pa otro aña e grupo di trabou tin planea pa tene un campaña pa stimula mas mayor pa bira lesado. Ya caba tin varios mayor cu ta acerca Bon nochi, drumi dushi pa bira lesado.

Bon nochi, drumi dushi no por keda sin gradici un bes mas Cede-Aruba cu a financia e proyecto y cu di un principio a kere den e proyecto y a apoya esaki.
Pa e anochi di clausura, Panaderia Huchada, Boekhandel Mariska y Memo no a duda pa duna e proyecto un man cu diferente articulo.
Bon nochi, drumi dushi kier gradici specialmente, sra Ennith cu di su mes a pasa Club Don Bosco y laga regalito pa e muchanan, pasobra e ta haya e proyecto un iniciativa tremendo.
Por ultimo mester menciona e grupo di mas importante cu ta e lesadonan. E trabou cu nan ta haci ta increibel.
Bon nochi, drumi dushi ta gradici tur mayor pa a accept’e den nan cas y ta haci un apelacion riba nan, pa no warda te otro aña juni, pero pa sigui lesa tur dia, maske ta 10 minuut, cu nan yiu.
Lesa ta dushi.

Olga Buckley

Bon nochi, drumi dushi periodo october 2008

Bon nochi, drumi dushi ta dilanti di e di tres periodo di bishita di contamento di storia na cas y e ultimo pa e aña aki. E siman cu a pasa e grupo di lesado, 40 na tur, a reuni pa prepara pa nan bishitanan.

Nan a ricibi nan lista di adres  y tambe e material, tas cu buki y marcado di buki, cu ya ta un custumber pa e proyecto.
Tin varios lesado cu riba propio iniciativa y motiva pa e interes cu e proyecto a lanta cerca nan 
a acerca nos di Bon nochi, drumi dushi pa bira lesado.
Bon nochi, drumi dushi ta aprecia e iniciativa aki masha hopi, pasobra e ta  prueba di e interes cu tin den e proyecto.
Den e grupo tin mas mayor e biaha aki, mientras cu ya e grupo di trabou a planea pa hiba un campaña prome cu e siguiente periodo, juni 2009, pa haña mas mayor interesa pa bira lesado.
Otro desaroyo sumamente importante ta e 250 inscripcionnan cu a drenta pa haya bishita di un lesado. Den e otro periodonan tras di lomba e acercamento tabata mas tanto di banda di e proyecto pa e famianan, poco poco nos ta yegando nos meta, e famianan mes ta  inscribi.
Tin mas inscripcion cu a drenta na biblioteca mes tambe.
E inscripcionnan ta basta concentra den cierto bario, pa e periodo di juni otro 2009, ta intensiva e campaña den e barionan cu inscripcion abou e biaha aki.
Bon nochi, drumi dushi tin cu keda ripiti e importancia di e motivacion y e  interes di e lesadonan, pasobra nan ta garantisa continuidad di e proyecto.

E programa di television di Bon nochi, drumi dushi, financia pa UNOCA, a haya un acogida fuerte cerca nos muchanan, locual ta un incentive importante pa promocion di lesamento.
E programa di television di Bon nochi, drumi dushi ta pasa dos biaha pa siman, diamars y diahuebs pa 6.30 na ATV y un biaha pa siman, riba diabierna pa 5’or na Tele-Aruba.
Keda pendiente pa e anochi di clausura na final de e periodo di october.

Bon nochi, drumi dushi
   
Bon nochi, drumi dushi ta lansa programa di television.

Skirbi pa Olga Buckley, sept. 08

E programa di contamento di storia na television Bon nochi, drumi dushi ta un parti integral di e totalidad di e proyecto di promocion di lesamento cu ta hiba e mesun nomber. For di un principio cu a presenta e proyecto den su totalidad na UNOCA, nan a demostra interes den e fase aki di e proyecto y a duna aprobacion pa financiamento di e programa di television Bon nochi, drumi dushi.
Manera por ta ta conoci aña pasa 2007 a inicia cu e proyecto aki, cu conoce diferente fase. E prome fase tabata un sondeo chikito di e factibilidad di un proyecto di e caracter aki. Den vacansi grandi dos lesado a bishita 4 cas pa presenta e idea y despues a bishita e famianan pa conta storia. E entusiasmo tanto di parti di mayor como mucha a motiva nos pa tene un proyecto piloto mas amplio na october 2007. Esaki a resulta den un exito rotundo, cu a duna lus berde pa tuma e reto di un Bon nochi, drumi dushi riba un escala hopi mas grandi y profesional cu financiamento di Cede-Aruba.
Na juni e aña aki, un grupo di 43 lesado a participa na e proyecto. Dialuna dia 26 di augustus a cuminsa cu e preparacionnan pa e di dos periodo di contamento di storia na cas pa e aña aki, cu ta October. E cobertura cu prensa ta dunando Bon nochi, drumi dushi ta un aporte valioso pa e meta di e proyecto esta promocion di lesamento.
  Den prome instante ta zona kisas poco straño cu un proyecto cu tin como meta, stimula lesamento cerca mucha, ta haci uzo di un medio di comunicacion manera television, cu hopi biaha ta hustamente kita e mucha su atencion for di lesamento. Ta un hecho, cu television ta forma parti di e mundo di e mucha awendia, nos no por ignora esaki. Pesey nos a dicidi di ‘uni forsa’ y haci uzo di e medio aki tambe pa promove lesamento.
 Durante skirbimento di e script e productor a tene cuenta cu diferente aspecto importante pa loke ta trata e e mucha di awendia, cu ta energetico, habri y tin un conocemento general y di tecnologia bastante amplio. A scohe pa e mucha mes tambe participa na e programa. A traha cu un grupo di 36 mucha, cu a participa pa cada programa den grupo di 6 pa 8 mucha.  E muchanan a gosa di e experencia aki, nan a participa hopi bon y tabata bastante disciplina.

E plan total ta consisti di 36 programa, di cua 12 ta cla pa transmiti na TV. Transmision di Bon nochi, drumi dushi lo tuma luga 2 biaha pa siman na ATV, riba diamars y diahuebs pa 6.30,  cuminsando riba diamars dia 9 di september y 1 biaha pa siman na Tele-Aruba riba diabierna pa 5’or, cuminsando riba diabierna 12 di september.
Lo tin cada bes un ripiticion di e programanan. Keda pendiente pa e dia y orario. E grabacionnan a tuma luga na Biblioteca Nacional Aruba, cu a coopera di un principio cu e proyecto.
 Bon nochi, drumi dushi ta den deliberacion pa financiamento di e siguiente fase di e proyecto cu ta un DVD di e programanan di TV. Keda pendiente, Bon nochi, drumi dushi tin mas na caminda.

Skirbi pa: Olga Buckley

Dia 27 di juni e grupo di lesado di e proyecto di lesamento na cas Bon nochi, drumi dushi a tene su evaluacion final. Un gran cantidad di lesado tabata presente y a comparti e rikesa di nan experiencia cu otro.

E experiencia di e 43 lesadonan tabata hopi varia y den varios caso a impacta e lesado y tambe esunnan presente. Unamimamente a conclui cu e proyecto tabata un exito y cu tin tur rason pa sigui prepara pa e periodo di october.
Dor di cu e biaha aki, contrario  na october aña pasa, e inscripcion tabata mas habri, e grupo di cas cu a bishita, tabata un grupo hopi varia.
Tin cu bisa, cu e grupo di lesado a cuadra e biaha aki completamente cu e vision di e proyecto. E grupo aki tambe tabata hopi varia, hopi mayor a fungi como lesado y e lesadonan tabata di diferente ramo di profesion.

Con cu bin con cu bay, cada mucha cu a haya bishita a gosa di esaki y tabata pidi pa haya mas bishita. Cu mucho gusto Bon nochi, drumi dushi kier a cumpli cu e deseo aki, pero nos tin cu tene cuenta cu nos kier duna tur mucha un oportunidad. Pero semper por keda pendiente.

A bin diferente punto di atencion dilanti cu lo tene na cuenta pa mehora e proyecto unda esaki ta necesario. Un di e puntonan bastante relevante pa tene na cuenta pa october ta e forma di inscribi. Pa esaki tuma luga na e miho manera posibel, a laga e inscripcion habri, asina ta tur hende ta liber pa inscribi di awo aki caba pa october.
Lo tin den ful e periodo aki foyeto di inscripcion na bali di Biblioteca. Apesar cu vacansi a cuminsa inscripcion via scol tambe ta keda habri.

For di e reunion a forma un grupo di trabou pa evalua e prepracionnan pa october. Nos ta spera cu na October nos por conta atrobe cu e sosten di Departamento di Asuntonan Social y e cooperacion incondicional di Biblioteca Nacional Aruba.
Ta bolbe tuma contacto cu e scolnan cu no a logra manda nan lista di mucha pa bishita. Un nota hopi importante y bunita ta e interes di diferente persona cu ta aserca ‘’Bon Nochi Drumi Dushi pa ta lesado den luna di october.

E experiencia cu e tatanan di famia y e mascotanan como lesado tabata tremendo. E mascotanan a encanta conta storia y comparti e placer di lesamento cu otro mucha.
Famianan a habri nan cas cu gusto pa e tatanan di famia, nos ta spera cu e experiencia aki motiva mas hende homber pa bira lesado na cotober.
Bon nochi, drumi dushi kier gradici Cede-Aruba pa e confiansa, pasobra sin e  financiamento di nan parti e proyecto lo no por a bira un exito.
Na e lesadonan ta bisa: ‘Un danki di curazon, boso ta campeon, nos ta topa bek na October 2008.

Na October 2007 a lansa e proyecto di lesamento na cas: Bon nochi, drumi dushi.
Durante e luna aki un grupo di 18 lesado a bishita 144 cas pa lesa of conta storia pa mucha di 4-8 aña y tur hende interesa den e famia. E acogida cu e proyecto a haya ta increibel. E famianan cu a haya bishita tabata sumamente entusiasma y den mayoria di caso e resultado tabata mesora visibel.

Hopi mayor a acepta e reto pa lesa pa nan yiu y varios famia a haya e caminda pa biblioteca (bek).
En todo caso, nos por bisa cu e proyecto pa loke ta su meta a yena un necesidad grandi pa loke ta motivacion di lesamento.
E atardinan di lesamento a crea tambe momentonan intimo y masha agradabel mes den e ambiente familiar.
Pa inicio di un proyecto di e indole aki, e cantidad di lesado (18) tabata bastante, pero compara cu e peticionnan cu nos a haya di famianan, cu tabata desea pa un lesado bishita nan cas, esaki tabata demasiado poco.

Nos a warda tur peticion cu e promesa na e famianan aki cu e siguiente biaha nan por a conta cu un bishita pa lesamento/contamento di storia.
E prome pensamento ora di lansamento di proyecto tabata pa ripiti esaki un bes pa aña den luna di october, e luna prome cu siman di buki.
Despues di analisa e miembrecia di BNA pa loke ta e grupo meta segun bario riba nos isla, nos a realisa cu lo ta bon pa tene e proyecto 2 biaha den aña en bes di un, pa e tin mas efecto.
Nos a pensa pa banda di e luna di october, tene e proyecto tambe den luna di juni, e luna prome cu vacansi di scol.
Ta obvio cu un luna extra di proyecto ta exigi tambe mas lesado boluntario, pasobra e proyecto ta depende completamente di e lesadonan boluntario.
Parti di e preparacion pa e proyecto pa luna di juni ta un tayer di contamento di storia, principalmente pa e lesadonan nobo.
 Pa medio di esaki nos kier invita bo pa participa na e proyecto Bon nochi, drumi dushi como lesado boluntario den luna di juni y duna di e forma aki bo aporte na crea/fortifica un cultura di lesamento na Aruba.

Succes voorleesproject breidt zich uit

Het voorleesproject dat in oktober op Aruba werd gehouden, op initiatief van Olga Buckley en i.s.m. de National Bibliotheek, heeft ook op Curacao de aandacht getrokken.

Een maand lang las een groep van 18 volwassenen op Aruba een grote groep kinderen vlak voor het slapen gaan voor. Dat gebeurde twee keer per week en er werden in totaal 144 huizen aangedaan. Het project, Bon Nochi, drumi dushi geheten, bleek zeer succesvol. Niet alleen de kinderen waren enthiousiast, maar ook de ouders die in vele gevallen beloofden om hun kinderen (regelmatiger) voor te lezen. Het uiteindelijke doel van het project was om het lezen binnen de families te bevorderen. Volgende week gaat initiatiefneemster Buckley naar Curacao om presentaties te geven aan de hoofdbibliotheek aldaar en aan de Pedagogische Academie. Regelmatig voorlezen, is volgens de organisatoren van het project namelijk goed voor de fantasie, woordenschat en het gehoor van het kind Bovendien versterkt het de band tussen ouder en kind.

Bron: Amigoe, 1-12-07

Clausura di proyecto: Bon nochi Drumi dushi

Diabierna 26 di october tabata clausura di e proyecto Bon nochi, drumi dushi, cu a core den full luna di october. For di dia 2 di october pa 25 di october un grupo lesado boluntario a bishita 125 cas, pa lesa pa e muchanan prome cu a bai drumi.
E lesamento na cas riba su mes tabata un exito rotundo, por bisa cu siguransa cu el a lanta e interes den lesamento y contamento di storia tanto cerca e mayor como cerca e mucha. E anochi di clausura tabata e momento culminante di e proyecto. For di trempan, muchanan acompaña pa ambos mayor a bishita Biblioteca Nacional  Aruba. E sala di exposicion tabata cang cang di hende. No tabata tin luga ni pa pone un feneta.
Tanto mucha como mayor a sinta riba flur y a colga for di Juffrouw Martica su boca, pa scucha storia. Prome nan a scucha e storia di ‘E solda y e heks’, despues cu nan apetit a habri, Juffrouw Martica a conta nan e storia di ‘E pisca di mas bunita’, y como ñapa nan a haya e storia di Nanzi; ‘Compa Nanzi ta bula cu hala di manteca’.
Juffrouw Martica Lugay ta un contado di storia excepcional.
Tur cuminsamento tin un final, pero ora e final di e anochi a yega, ata ni mucha ni mayor kier lanta bai cas. Un cos si, mayor a hay como tarea pa sigui cu e contamento di storia na cas, pa tur hende cu kier scucha.
Organisadornan di e proyecto Bon nochi drumi dushi por ta orguyoso cu e acogida di e proyecto y nan por ta sigur, cu nan a traha na e clima di lesamento na Aruba. Sigur pa loke ta e placer cu un persona por sinti ora e scucha storia.
Tanto e proyecto como e Anochi di fantasia a bira un exito dor di involvimento dia varios instancia y persona. Un danki na Biblioteca Nacional Aruba, e grupo di boluntarionan, Zahira Zaandam y tambe sponsernan.

Olga Buckley

Proyecto Bonochi, drumi dushi
Bonochi drumi dushi ta un proyecto di lesamento na cas cu kier brinda comunidad di Aruba un herment di sosten pa reviva e interes den lesamento of fortifica esaki. Idea tras di e proyecto aki ta pa bishita e mucha na su cas, na ora di bai drumi y lesa p’e.

Bonochi, drumi dushi, tin como meta promove lesamento na cas. Lesamento/contamento di storia ta stimula e mucha su imaginacion, su idioma, su oido y e contacto intimo cu su mayor. A lo largo e por stimula interes den lesamento serca e mucha. E proyecto ta enfoca riba e mucha di 4-8 aña, pasobra esaki ta e edad mas apropia pa lanta interes den lesamento serca e mucha. Studiantenan di IPA y otro interesado  lo fungi como lesado/contado di storia.

E studiantenan cu fungi como lesado por usa e proyecto aki como proyecto pa atkeri punto di studio. E proyecto tin un duracion di dos luna en total. E lesamento lo tuma luga durante dos siman pa cada cas, 2 biaha pa siman, riba diamars y diahuebs entre 6.00 – 8.00. p.m., cu un duracion di 30 min pa cada cas. E proyecto ta tuma luga durante e lunanan di october y november, den e periodo rond di siman di buki. E proyecto aki ta bao encargo di Señora Olga Buckley.

Groot voorleesproject

Een omvangrijk voorleesproject is deze week begonnen om lezen en/of voorlezen thuis te stimuleren.
Een maand lang bezoekt een groep van 18 volwassenen de kinderen thuis vlak voor het slapengaan. De groep legt twee keer per week, op dinsdag en donderdag, de huisbezoeken af en in totaal worden 144 huizen aangedaan. Een van de sponsoren van het voorleesproject Bonochi, drumi dushi is Biblioteca Nacional Aruba, die daarmee het lezen binnen families wil bevorderen.

Door kinderen tussen de vier en acht jaar voor te lezen of verhalen te vertellen wordt de interesse voor lezen aangewakkerd, hoopt de organisatrice Olga Buckley. Bovendien is het goed voor de fantasie, woordenschat, gehoor en de band tussen ouder en kind. Dit in tegenstelling tot de heersende mode om kinderen vlak voor het slapengaan televisie te laten kijken, in veel gevallen naar gewelddadige films, of het laten spelen met computerspelletjes, aldus de initiatiefnemers. De kinderen komen daardoor onvoldoende tot rust, waardoor ze dikwijls de volgende dag drukker zijn dan normaal. Het invoeren van een voorleesritueel brengt bovendien structuur in het leven van een kind op het moment van slapen gaan. Volgens de organisatoren is dat bij opgroeiende kinderen erg belangrijk.
Het voorleesproject wordt op 26 oktober 2007 afgesloten met een feestelijke activiteit: Nochi di Fantasia. Kinderen die mee willen doen, moeten hiertoe een formulier invullen dat verkrijgbaar is bij de voorlezers van het project of de bibliotheek.

Bron: Amigoe, oktober 2007

Bon nochi, drumi dushi ta pone nos muchanan drumi dushi asina.

E proyecto Bon nochi, drumi dushi tin Aruba den gara di storia.
Den su piyama cu su cusinchi of peluche bon brasa e mucha ta para den porch ta warda. Otro ta para den porta di cas of ta den cama ta bati pia bou di clechi, pa e lesado yega pa caba.
Grito di alegria y cara contento yen di espectativa ta ricibi e lesado. Cama of stul ta prepara, airco of fan ta cendi, bentana pa aire fresco ta habri, scenario ta cla, ta storia nan kier scucha.
Tin mayor cu ta pasa cu nan trein den bario ta busca mucha y trece nan nan cas, pa comparti e alegria di scucha storia.
Mayor ta bira mucha bek, ta hala acerca y ta scucha storia cu mesun atencion y alegria cu e mucha.
Ambiente ta dushi y intimo, e mucha ta drumi dushi den su cama of ta sinta den grupo den den salo of patio ta scucha, mama y den hopi caso papa tambe ta comparti.
Hunto cu e lesado e mucha  ta subi avion di fantasia, tin biaha di suspenso of aventura te yega su destino, un soño dushi relaha y profundo.
Tin mucha y mayor cu ta haya asina hopi gana den contamento di storia, cu despues di prome bishita di e lesado ata nan mes kier conta storia.
Mucha cu a gusta un storia of un buki hopi, ta pidi mayor pa cumpra e buki pa nan.

Despues di 3 siman e proyecto Bon nochi, drumi dushi ta cana dushi manera un trein bon zeta.
E lesadonan boluntario ta sumamente entusiasma y emociona  pa e manera con famia na Aruba ta habri porta di cas y camber pa nan conta storia pa nan yiu.
E entusiasmo di e lesadonan boluntario ta bal oro y ta loke ta duna e proyecto briyo, pasobra sin lesado no tin contamento di storia.
E entusiasmo aki a contagia algun instancia comercial tambe cu no a duda pa duna un man na e proyecto.
Sin contamento di storia e mecha, di interes den lesamento y contamento di storia, ta keda friu friu.
E lesadonan a keinta e mecha aki y a pone e suafel, pa cende e mecha, den man di mayor.
E clima ta habriendo, mayor a gara e suafel cu man habri.
Tin un siman mas di contamento di storia, pa corona obra, diabierna dia 26 di October di 7 pa 8 di anochi, ta clausura e proyecto pa e aña aki, anto con! Cu un Anochi di Fantasia.
Bon nochi drumi dushi si no ta bai sosega, e ta cuminsa prepara e avion di fantasia pa otro aña lanta buelo atrobe y bishita e muchanan cu no a haya bishita di lesado e aña aki.
Asina ta, keda pendiente!