E bolo di chuculati
Cu Festival di buki pa Mucha lo tin un buki dushi dushi riba mercado

Durante e Siman di Buki, manera custumber, e librerianan participante ta regala, cu cada compra di un buki di mucha na un suma stipula, e “Regalo di Festival di Buki di Mucha”. E aña aki “E bolo di chuculati” ta e escohencia pa e festival. E bolo di chuculati a wordo skirbi dor di Pilar Ramos y ilustra pa: Ma. Rosa Aragó. Marlon van der Linde a traduci e buki na Papiamento.
E storia ta tocante dos mucha cu ta bay serca nan tanta cu ta traha un bolo di chuculati pa nan. Den forma wegero, usando e situacion, ta trata e 5 sentidonan, mira, scucha, hole, tende y fula/sinti. Na final nan ta come e bolo.

Organisadornan di e festival ta masha contento cu e publicacion aki cu pronto muchanan na Aruba por haya pa lesa y disfruta di dje.

Workshops pa maestro di scol basico

Festival di buki pa mucha ta un actividad anual di Biblioteca Nacional Aruba den cuadro di stimula lesamento. Cu e tema: “Lesamento, nos cos dushi” biblioteca ta organisa e festival di buki pa mucha na november venidero. E festival aki ta ofrece scolnan y centronan di cuido pa mucha e posibilidad pa organisa un proyecto activo y dinamico pa e muchanan. Maestronan por stimula mucha pa (sigui) lesa. E aporte di maestro ta hopi importante. Ta maestro por percura pa tur alumno ta activo cu e tema, e bishita di un autor, y por move mucha pa bai den e maraviya di mundo pa medio di buki. Biblioteca ta ofrece maestronan tayer pa stimula nan grupo di mucha. E workshop, cu un duracion di 2 ora, tin como obhetivo pa entusiasma y inspira maestro, informe con pa pensa critico relaciona cu e criterionan ora di adkiri nutricion pa di e forma ey traspasa eseinan na su alumnonan, pa na nan turno hiba un bida saludabel. Temanan cu ta trata ta: realisa un ambiente di lesamento ameno y agradabel, exposicion di material cu ta promove alimentacion saludabel y movecion, traha cu buki den klas, actividadnan rondo di e tema “Lesamento, nos cos dushi”, actividad cu dicho y proverbio, sugerencia pa otro buki, storia, articulo cu tin di hasi cu e tema, sugerencia pa otro actividad cu por hasi den clas rondo di e tema alimentacion saludabel y movecion.

Biblioteca Nacional Aruba den cuadro di preparacion pa e festival di buki ta organisa 2 workshop pa maestronan di scol.

Workshop 'Lesa buki, nos cos dushi'
 
Pa Oranjestad:  19 y 21 October 2009
                        Ora: 3.00 - 5.00 pm
                        Lugar: Biblioteca Nacional Aruba - Sala Diamante
 
Pa San Nicolas:  20 y 22 October 2009
                         Ora: 3.00 - 5.00 pm
                         Lugar: Biblioteca Nacional Aruba, San Nicolas
 
Participantenan ta maestro(a)nan di scolnan basico, cu un maximo di 4 participante pa scol. Inscripcion ta posibel, por yama Seraja of Zenia na biblioteca, 582 1580. Biblioteca ta desea tur maestro y alumno un festival hopi placentero y fructifero. Pa mas informacion www.bibliotecanacional.aw

Lesa buki, Nos cos dushi!
Preparacionnan pa e festival di buki di mucha ta den full swing. E comision y e autornan participante como tambe contadornan, poetanan y ilustradornan ta preparando pa un siman yen di storia ‘dushi’ y mucha cu ta ‘saboria cos dushi’.

Hulanda:      
Olga Orman
Wijnand Stomp
Evelien van Dort
Wendela de Vries

Corsou:
Tanchi Merly Augusta
Richard Hooi

Boneiro:
Denise de Jongh-Rekwest
Monica Clarinda

Aruba:
Olga Buckley
Gino Vrolijk
Astrid Gietel
Gianella Gabriela
Madeleine Maduro
Marlon van der Linde

Pakico un Festival di Buki pa Mucha?

E meta principal di Festival di Buki pa Mucha ta promocion di buki y lesamento. Specialmente na edad di scol basico ta importante pa desaroya cerca e mucha e motivacion pa lesamento y conocemento di literatura pa mucha. Banda di atencion pa e parti tecnico y e parti di comprension di lesamento, PLACER DEN LESAMENTO ta esencial.

Con por stimula e placer den lesamento cerca e mucha?
Bon acceso na buki, buki atractivo;
Lesamento na bos halto pa mucha, “voorlezen”;
duna e mucha oportunidad pa scoge un buki su mes y les’e na su mes ritmo,  “vrij lezen”;
papia cu e mucha  tocante buki y lesamento;
desaroya actividad rond di buki y lesamento.

E Festival di Buki pa Mucha ta enfoca riba bishita di escritor na scol. E encuentro cu autor y/of ilustrador ta hopi biaha un experencia inolvidabel pa e mucha y un estimulo grandi pa bay lesa buki di e autor. Biblioteca Nacional Aruba tin e experencia cu mucha ta bin biblioteca busca buki di e autor cu a bishita nan. Un autor p.e. cu semper a keda fascina e muchanan ta Paul van Loon, kende na dos ocasion a participa na Festival di Buki pa Mucha. E Festival ta dirigi riba goso y fascinacion di e mucha pa buki.

Pa noticia di e festival por fabor download nos boletin

Festival di Buki di Mucha 2008 dedica na Poesia: Pensa, piki, pone palabra

Pa di diesseis biaha Biblioteca Nacional Aruba ta organisa e conocido Festival di Buki di Mucha. Esaki den cuadro di promocion di lesamento. Apertura ta tuma lugar diadomingo dia dos di november proximo dilanti Biblioteca na Playa, manera custumber. E festival mes ta di dia 2 di november pa 7 november 2008. E tema di e aña aki ta Poesia. E slogan ta “Pensa, piki, pone palabra”.

Biblioteca ta organisa e festival hunto cu Departamenti di Enseñansa, IPA y Stichting Culturele Manifestaties NANA. Autornan participante ta bini for di Hulanda, Belgica, Venezuela, Corsow, Boneiro y Aruba. Biblioteca ta spera Ted van Lieshout for di Hulanda y tambe Joyce Herry, (naci na Aruba). Foi Corsow a invita Alvin Inecia, miho conoci como “Tio Ali”, Tanchi Merly Augusta y Richard Hooi. Ta spera Sr. Gaby Mercera for di Boneiro. Gabi a participa aña pasa tambe den e festival y a pone grandi y chiki rima y sigui ripiti cu su obranan ritmico for di Boneiro. Diana Abreu ta bini for di Venezuela.
Autornan local cu ta participa ta Olga Buckley, Munye Oduber-Winklaar, Gino Vrolijk y Desiree Correa, tambe contadornan di storia Diana Marchena y Astrid Gietel.

Pa prome biaha Biblioteca ta celebra e festival hunto cu EPB (Ciclo basico 1). E autornan bishitando e scolnan di EPB ta:
Desiree Correa, Jacques Thonissen, Olga Buckley, tur tres di Aruba. Gibi Bacilio y Tio Ali di Corsou y Bart Moeyaart di Belgica.

Mescos cu na Hulanda, unda nan ta celebra e asina yama “Kinderboekenweek” den luna di oktober, e idea tras di e festival aki ta pa trece e mucha, e autor y e buki mas serca di otro pa asina stimula e placer di lesamento.

Tur scol ta ricibi un pakete di material, cu por haci uso di dje como preparacion pa e festival. Un preparacion cu ta wordo complementa cu entre otro e bishita di autornan local, autornan for di Hulanda y Antiyas na tur e scolnan preparatorio y special na Aruba. Tambe e diferente actividadnan cu ta tuma lugar tur rond di nos isla, manera e atardinan di presentacion na Biblioteca, e actividadnan na e librerianan y na e diferente organisacionnan cu ta trata mucha, ta forma parti di e gran evento di lesamento aki cu ta cuminsa cu e apertura oficial na Biblioteca Nacional Aruba na Oranjestad.

E Festival di Buki di Mucha semper ta cuminsa cu e dia di e apertura oficial - consistiendo di e famoso mercado di buki, presentacion di Emmaschool rond di e tema den forma di teatro, baile y musica, introduccion di buki nobo y mucho mas – te na e siman unda e diferente autornan di Aruba, Antiyas y Hulanda ta bishita e scolnan di Aruba, Biblioteca Nacional Playa y San Nicolas, e librerianan y otro organisacionnan envolvi. Studiantenan di IPA lo prepara un bunita exposicion na biblioteca y ta yuda cu e decor.

E clausura di e festival ta duna chikito y grandi un oportunidad mas pa disfruta di e diferente actividadnan rond di lesamento hunto cu e autor y ilustradornan cu ta participa.

Biblioteca Nacional Aruba ta invita tur mucha pa participa na e Festival di Buki di mucha. Ta invita mucha pa Pensa, piki, y pone palabra den e proximo dianan. Apertura ta tuma lugar diadomingo dia 2 di november pa 4’ or di atardi dilanti di Biblioteca Nacional Aruba na George Madurostraat. Bishita di e autornan na scolnan lo tuma luga den e siman di 3 te cu 7 di november proximo.

Manuel y Belinda
Cu Festival di buki pa Mucha lo tin dos buki nobo riba mercado

Durante e Siman di Buki, m custumber, e librerianan participante ta regala, cu cada compra di un buki di mucha na un suma stipula, e “Regalo di Festival di Buki di Mucha”. E aña aki por cierto tin dos buki di mucha, cu ta e buki ‘Manuel’ di Desiree Correa y e buki ‘Belinda’ di Diana Abreu.

Pa mas informacion tocante e autornan participante y bukinan di poesia na e nivel di lesamento desea, por bishita y busca informacion na Biblioteca Nacional di Aruba y na e diferente librerianan local. 

Den cuadro di e tema di e Festival di Buki di Mucha, Biblioteca Nacional Aruba ta ofrece maestronan di scol basico y preparatorio un workshop riba Poesia pa mucha, pa tuma lugar entre 17 di september cu 16 di oktober 2008. Un tayer cu indirectamente ta amplia e conocimento di poesia en general cerca e muchanan di scol. Workshop ta un introduccion con pa siña mucha di scol basico, skirbi, rima, verso, poesia y cuenta. Ta duna herment/instrumento cu por usa pa mehora skirbimento di poesia.

Contenido: E contenido ta un historia di poesia en general, en breve. Na ordo lo bin: 1. Estilonan y tecnicanan di poesia. 2. Forma y contenido di poesia 3. Les den grammatica di Papiamento (idioma tonal, posibilidad y limitacion ora di skirbi poesia, musica, etc) 4. Les den declamacion. Enfasis lo wordo poni riba skirbimento di poesia na Papiamento y tambe declamacion di poesia. Docentenan ta Sra. Desiree Correa y Sra. Munye Oduber-Winklaar.

Poëzie centraal op kinderboekenfestival

De zestiende editie van het kinderboekenfestival georganiseerd door de Nationale Bibliotheek staat in het teken van poëzie. Het festival wordt dit jaar van 2 tot en met 7 november gehouden. De kinderboekenschrijvers die zijn uitgenodigd om te komen voorlezen, zijn inmiddels ook bekend. Uit Nederland komen Ted van Lieshout en Joyce Herry; uit Curaçao Tio Ali, Tanchi Augusta en Richard Hooi; uit Bonaire Gaby Mercera en dit jaar komt er ook een auteur uit Venezuela, de kinderboekenschrijfster Diana Abreu. Van Arubaanse zijde doen de schrijvers Olga Buckley, Munye Oduber-Winklaar, Gino Vrolijk, Desiree Correa, Diana Marchena en Astrid Gietel mee.
Volgens traditie wordt speciaal voor het festival een boek geschreven.

Het evenement wordt jaarlijks gehouden en is bedoeld om kinderen kennis te laten maken met schrijvers en om ze te stimuleren om boeken te lezen. De grote feestelijke opening van het kinderboekenfestival vindt op zondag 2 november plaats op straat voor de hoofdbibliotheek in Oranjestad.

Bron: Amigoe, 29 augustus 2009

Zinnen verzinnen in Kinderboekenweek